Policia e Mallakastrës ka arrestuar dy vëllezër, të cilët akuzohen për deklarim të rremë për të fshehur ngjarjen. Në pranga janë vënë shtetasit Elis Pashaj, 28 vjeç, dhe Juli Pashaj, 26 vjeç, të dy banues në Ballsh.
Dy vëllezërit Pashaj ishin paraqitur në spitalin e Ballshit për të marrë mjekim, pasi ishin plagosur me thika. Pas shoqërimit në komisariat për të dëshmuar mbi ngjarjen, ata kishin deklaruar se ishin konfliktuar me njëri-tjetrin dhe kishin plagosur njëri-tjetrin.
Ndërkohë, ata gënjyen për të fshehur ngjarjen. Pas hetimeve të uniformave blu rezultoi se dy vëllezërit ishin plagosur për motive të dobëta, nga shtetasi Agur Beqiraj, 76 vjeç, banues në Ballsh, (fqinji i tyre).
Dy vëllezërit Pashaj akuzohen për veprën penale “Deklaratë e rreme përpara oficerit të policisë gjyqsore”. Gjithashtu, është arrestuar edhe fqinji i tyre shtetasit Agur Beqiraj, 76 vjeç për veprën penale “Vrasje me dashje”, e mbetur në tentativë.
Materialet procedurale i kaluan Prokurorisë për veprime të mëtejshme.
