Shqipëria U-19 triumfoi 3-2 ndaj Malit të Zi, në ndeshjen e parë miqësore të luajtur mesditën e sotme në Tuz.
Kuqezinjtë e drejtuar nga Julian Ahmataj zhvilluan një ndeshje të mirë, me raste dhe tre gola të shënuar nga Ron Hasani, Dran Vranici dhe Xheto Joi Nuredini.
Goli i parë për kuqezinjtë do të vinte vetëm në minuten e 31-të falë Ron Hasanit.
Sulmuesi shqiptar përfitoi nga gabimi i vendasve dhe shënoi golin e parë për kuqezinjtë. Malazezët barazuan pas 11 minutash lojë dhe pjesa e parë u mbyll me rezultatin 1-1.
Fraksioni i dytë nis shumë mirë për Shqipërinë e Ahmatajt, që realizon golin e dytë dhe kalon sërish në epërsi falë Vranicit. Fabjan Përndreca dhuroi bukur një top nga e majta, me Vranicin që gjendet në zonë dhe dyfishon shifrat falë një goli me kokë.
Kuqezinjtë nuk ndalen këtu, por tentojnë dhe krijojnë raste derisa gjejnë edhe golin e tretë me Xheto Joi Nuredinin në minuten e 60-të.
Kapiteni Sulejmani asiston për autorin e golit, i cili me mjaft finesë dërgon topin në rrjetë dhe trefishon shifrat. Malazezët ngushtuan rezultatin në 2-3 në minutën e 77-të. Pavarësisht golit, fitorja i takon kuqezinjve, me ndeshjen e parë miqesore të luajtur në Tuz që mbyllet me rezultatin 2-3 për Shqipërinë e Julian Ahmatajt.
Shqipëria do të luajë edhe një ndeshje tjetër miqësore kundër Malit të Zi të dielën në “Reshit Rusi” në Shkodër.
