Ish-portieri i Skënderbeut, Kostandin Dramolli, ka vendosur ta mbyllë me futbollin e luajtur, duke “varur dorezat në gozhdë” në moshën 25-vjeçare, teksa ka zgjedhur t’i përkushtohet muzikës.
Djaloshi korçar, gjatë karrierës së tij, përveç klubit korçar, ku u shpall kampion me skuadrën U-19 të Skënderbeut, ka qenë edhe pjesë e Bylisit, Pogradecit, skuadrës greke Pierikos dhe së fundmi Maliqit.
Sezonin e shkuar Dramolli ishte pjesë e maliqarëve në Kategorinë e Dytë, ku mbajti edhe shiritin e kapitenit, gjithsesi pasioni për muzikën rep, bëri që 25-vjeçari të hiqte dorë përfundimisht nga futbollit, teksa tani i gjithë fokusi do të jetë te muzika.
Gjatë këtyre viteve, Dramolli ka qenë edhe i dënuar nga gjykata me burg, duke pasur një jetë të vështirë dhe kjo ka qenë një nga arsyet pse ai vendosi të shpaloste talentin në muzikën rep.
Emri i artit që Kostandini ka zgjedhur në këtë industri muzikore, është: Çekiçi 14, ku së fundmi ka publikuar edhe 2 këngën e tij.
