Presidenti amerikan Joe Biden i është drejtuar kombit duke folur në Uashington për uraganin që po afrohet në Florida.
Ai ka theksuar se ajo çfarë pritet të mbërrijë në Florida është stuhia e shekullit për këtë shtet amerikan. Ai kërkoi nga qytetarët që të bashkëpunojnë me autoritetet dhe t’i përgjigjen thirrjes për zhvendosje në zonat e sigurta.
Ndërkohë sipas ekspertëve rreth 3% e prodhimit të brendshëm bruto të Amerikës ndodhet pikërisht në rrugën që pritet të përshkruaj Uragani.
“Në më pak se 12 orë, Uragani do të mbërrijë në bregun perendimor të Floridas. Erërat do të jenë të egra, mbi 160 km/h, ndërsa niveli i ujit pritet të rritet deri në 4 metra, duket si stuhia e shekullit – tha ndër të tjera Biden.
Rrugët tashmë në shumë qytete janë mbyllur ndërsa banorët janë zhvendosur në strehimore. Administrata Biden bëri thirrje ndaj biznesve dhe kompanive të fluturimit që të mos abuzojnë me çmimet për shkak të fatkeqësisë që pritet të godasë Floridan.
