Kapiteni i bluve Blerim Kotobelli ka folur para ndeshjes së javës së 8-të në Superiore sot me Tiranën në Durrës.
Duke folur për “Panorama Sport” ai shprehet se ekipi është i gatshëm dhe ndaj Tiranës do të kërkohet vazhdimësia dhe synimi është i qartë fitorja.
Sfida ndaj Tiranës- Është një ndeshje mjaft e rëndësishme për ne, e presim me atmosferë të mirë dhe presim që të fitojmë. E dimë të gjithë lojtarët, çfarë rëndësie ka kjo ndeshje për ne, dhe duhet të japim maksimumin.
Vazhdimësia e Teutës- Patjetër që skuadra është e gatshme si fizikisht ashtu edhe psikologjikisht për të vijuar me fitore. E kam thënë edhe në të tjera intervista, se ne kemi ditur të kemi vazhdimësi në situata si kjo.
Me Laçin, ishte një ndeshje e mirë, por tani duhet të jemi në këtë ritëm, pasi patëm shumë shanse, dhe dominuam. Me pak fjalë ishte një ndeshje e mirë. E përsëris e shoh ekipin të gatshëm dhe me fokus 100% për të fituar të dielën.
Barazimi e kënaq Teutën? Normalisht jo. Tri pikë quhen një rezultat pozitiv dhe pak rëndësi ka ekipi kundërshtar apo fusha ku luajmë ne do të luajmë për 3 pikë. Ky është mentaliteti edhe qëllimi që kemi.
Mesazh për tifozerinë? Po, pak a shumë është një mesazh që të jenë sa më të shumtë, pasi këta djem e kanë të nevojshme mbështetjen nga qytetarët e mrekullueshëm durrsakë. Të na mbështesin për të fituar ndeshjen dhe të festojmë së bashku.
