Ka ndërruar jetë në spitalin e Traumës 29-vjeçari Enea Thomaraj. Ai mbeti i plagosur për shkak të shpërtjhimit me tritol të regjistruar në banesën e motrave Xhovana dhe Alda Nikolli, të regjistruar më 14 Korrik në Elbasan.
Tritoli u hodh në orët e para të mëngjesit të së dielës së 14 Korrikut në derën e banesës së motrave Nikolli, por si pasojë e shpërthimit të fortë mbeti i plagosur Enea Thomaraj, fqinji i dy motrave, i cili në ato momente sapo kishte dalë nga dera e tualetit dhe e goditi dera e banesës së tij.
Për shkak të plagëve të marra, ai ndodhej në gjendje të rëndë dhe nuk ka arritur dot të mbijetojë, duke ka ndërruar jetë pas rreth 3 muajsh në spital.
Motrat Nikolli janë nga Lezha por ishin shpërngulur në banesë me qira në Elbasan. Ato akuzojnë drejt për drejt të penduarin e drejtësisë Nuredin Dumani për këtë krim.
Alda Nikolli pretendon se ishte e lidhur me Nuredin Dumanin, ndërkohë që ky i fundit kishte njëkohësisht të dashur dhe Mirjete Hajdinajn nga Kosova. Kur e ka marrë vesh kjo e fundit, sipas Aldës, ai i ka kërcënuar deri sa dhe kreu krimin e rëndë me tritol.
Alda Nikolli ka publikuar edhe fotot se si fliste me skype me Nuredin Dumanin nga qelia e burgut. Ndërkohë, motra e saj, Xhovana Nikolli është e lidhur me të penduarin tjetër të drejtësisë, Amarildo Nikolli alias Xhanej dhe pretendon se Dumani e ka rrahur këtë të fundit, pasi ndodhen në një burg.
“Neve na vendosën një tritol në shtëpi, kjo erdhi si pasojë e një videoje, mendoj dhe dyshoj unë. Gjithashtu edhe një kërcënim që ne kemi marrë dy ditë përpara shpërthimit. Unë nuk di të kem pasur ndonjëherë probleme me njeri. Edhe nga ju është verifikuar që unë nuk kam pasur probleme. I vetmi kërcënim që unë kam marrë është i Nuredin Dumanit. Nuredin Dumanin unë e kam njohur nëpërmjet Amarildo Xhanej, kunatit tim, dhe ndodhet aktualisht në burgun 313. Ndodhen në një godinë. Jemi njoftuar nëpërmjet skype-it, kemi lidhur kontaktet e kemi vazhduar të flasim. Kemi folur 24/24. I lejohej atij. Nuredini është drejtor i burgut, jo i burgosur, se di kush e thotë. Mendova që donte të njihej, por paska pasur qëllim për të më përdorur, si mua dhe si motrën time Xhovanën. Atëherë qëllimi i Dumanit ishte që t’i hiqte statusin Amarildos, të pushonte nga puna prokuroren edhe të lante haqet me hasmin nëpërmjet meje. Më ka kërcënuar me Amarildon, e ka rrahur dy herë në burg brenda 1 jave e gjysmë.” – ka deklaruar Alda Nikolli në atë kohë për mediat.
Deri më tani kjo ngjarje mbetet e pazbardhur dhe asnjë person i arrestuar, teksa referuarf raportimeve mediatike, Policia e Elbasanit nga këqyrja e kamerave të sigurisë, kanë filmuar një person duke lëvizur në zonë në orën kur ka ndodhur shpërthimin me tritol. Policia ka identifikuar personin e dyshuar, i cili rezulton me precedent të mëparshëm penal dhe është shpallur në kërkim.
Vlen të theksohet dhe fakti se pak kohë pas kësaj ngjarjeje, SPAK lëshoi 33 urdhër-arreste për organizatën kriminale të trafikut ndërkombëtar të kokainës e udhëhequr nga vëllezërit Franc dhe Hajdar Çopja, teksa operacioni u bazua edhe në dëshmitë e Nuredin Dumanit. Ka dyshime se mund të jetë edhe e kundërta, një tentativë për t’i hequr statusin e të penduarit Dumanit.
