Kryetari i Lëvizjes BASHKË, Arlind Qori në një intervistë dhënë në studion e lajmeve në “Ora News” komentoi atë që pritet të ndodhë sërish me çmimin e bukës së shqiptarëve, i cili pritet të rritet me afro 15 për qind, kjo si pasojë e rritjes së çmimit të energjisë elektrike për furrat e bukës.
Për Qorin, pas 1 nëntorit kur të rritet çmimi i bukës, shtrenjtimi i bukës do të jetë më i lartë se indeksimi i fundit i qeverisë për pagat e pensioneve për të moshuarit.
Qori u shpreh se pensionistët mbahen nga familjarët e tyre, pasi nuk i mjafton çfarë iu jep shteti.
“Sikur pensionistët të jetonin vetëm me pensionin e tyre, ne në Shqipëri do të kishim rreth 200-300 mijë njerëz rrugëve duke lypur.
E vetmja arsye që ata nuk lypin është se familjarët e tyre u vijnë në ndihmë, pasi për ta është e pamundur të mbijetosh.
Pensioni mesatar është nën minimumin jetik, lërë pastaj pensioni minimal. Pra, po të ishte për qeverinë shumica e të moshuarve do të ishin sot duke lypur.
Ata mbijetojnë sepse mbahen nga fëmijët e tyre në emigracion dhe mendoj se një nga arsyet e shpeshta se pse ikin nga Shqipëria është fakti se ata po ikin thjesht për të ardhmen e fëmijëve të tyre, por po ikin edhe për të mbajtur prindërit e tyre”, u shpreh ndër të tjera kreu i Lëvizjes BASHKË, Arlind Qori.
