Ilir Hoxha ka marrë ditën e sotme zyrtarisht detyrën si Drejtor i Përgjithshëm i Policisë së Shtetit. Ai është prezantuar nga ministri i Brendshëm Ervin Hoxha në ambientet e Drejtorisë së Policisë.
Në fjalën e tij, ministri Hoxha tha se sot hapet një kapitull i ri në rrugën e Policisë së Shtetit, pasi sipas tij, Proda do të sjellë një dinamikë tjetër në organizatën e uniformave blu.
“Sot hapim një kapitull të ri në rrugën e përpjekjes së organizatës së policisë për tu rritur dhe zhvilluar profesionalisht. E vetmja vështirësi e drejtorit të ri edhe kjo në aspektin pozitiv mbetet standardi ku është ngritur Policia e Shtetit e cila duhet të vijë në rritje dhe konsolidim. Kam besim të plotë se, në përfundim të këtij procesi reformues për strukturat drejtuese të policisë, do të krijohen kushtet e nevojshme për të arritur synimin e madh: ndërtimin e një policie moderne, e cila do të jetë e krahasueshme me strukturat e vendeve të Bashkimit Evropian”, tha ministri Hoxha.
Ndërsa, Ilir Proda u betua se do të mbajtë me nder flamurin e Policisë së Shtetit.
“I nderuar zoti ministër i Brendshme, në këtë çast solemn të veprës së të gjithë brezave të policisë shqiptare, në shenjë nderimi, detyrimi dhe respekti, për gjakun e punonjësve të policisë të rënë dhe të plagosur në krye të detyrës, në emër të të gjithë punonjësve të policisë së shtetit, të vendosur për të mbrojtur rendin dhe sigurinë publike, për të garantuar zbatimin rigorozisht të ligjit, në nderim tim personal betohem për të mbajtur me nder flamurin e policisë së shtetit”, tha Proda.
Gjithashtu, kryepolici bëri dhe zotimin e tij të parë ku tha se proceset e reja konkurruese në Policinë e Shtetit do të bazohen vetëm në performacë dhe integritet.
“Një falënderim për besimin që më ka dhënë kryeministri dhe ministri, për këtë detyrë të lartë. Duke qenë se jemi në procese të reja konkurruese, garantoj se ato do të jenë të bazuara mbi performacën që ka çdo drejtues që do të garantojë dhe integritetin. Asnjë faktor tjetër nuk do të ndikoj, për këtë jap garanci maksimale”, tha Proda.
