Gjykata e Posaçme ka shpallur moskompetencën për gjykimin e ish-zyrtarëve Ferzilet Hajdëri, Adnand Toçi, Diana Dedja, Bashkim Salillari dhe Hanza Reka, duke i ndarë nga çështja e ish-kryebashkiakut të Durrësit, Vangjush Dako.
Kjo ndarje u bë me kërkesë të vetë të akuzuarve, të cilët kërkuan gjykim të zakonshëm. Gjyqtarja e GJKKO-së, Elsa Ulliri vendosi kalimin e dosjes në ngarkim të këtyre personave në Gjykatën e Durrësit, si gjykatë kompetente për të shqyrtuar çështjen ndaj tyre, të akuzuar për veprën penale “shpërdorim detyre”.
Sakaq në Gjykatën e Posaçme mbetën nën hetim ish-kryebashkiaku Vangjush Dako, Fiqiri Farruku, Fatmir Ejupi dhe Adrian Bulku.
Vlen për t’u theksuar fakti se për çështjen e Dakos aktualisht nuk ndodhet asnjë person në burg. I fundit që u lirua ishte Fatmir Ejupi, punonjës i Urbanistikës në Bashkinë Durrës, në këmbim të garancisë pasurore prej 700 mijë lekësh.
Vangjush Dako u arrestua më 6 qershor të vitit të kaluar me urdhër të Prokurorisë së Posaçme nën dyshimet se ka kryer veprën penale të “shpërdorimit të detyrës” kryer në bashkëpunim, në dy raste.
Rasti i parë lidhet me një objekt që sipas hetimeve ka ndërtuar disa kate pa leje, të legalizuara me procedura që dyshohen jo të rregullta. Objekti pësoi dëmtime të konsiderueshme nga tërmeti i 26 nëntorit 2019. Pas kësaj, për çështjen pati një kallëzim nga banorët e këtij pallati. Dako akuzohet dhe për një procedurë tenderimi, vlera e të cilit sipas hetimeve, është fryrë artificialisht nga Bashkia Durrës. Kallëzimi për parregullsi në këtë tender është bërë nga ish-kreu i PD-së Durrës, Ferdinand Xhaferraj.
Vangjush Dako kreu 9 muaj paraburgim, teksa la qelinë më 27 shkurt 2024 pasi skaduan afatet e paraburgimit dhe ndaj tij u caktua masa arrest shtëpie. Vlen të theksohet fakti se Vangjush Dako është person i shpallur “non grata” nga Departamenti Amerikan i Shtetit.
