Ish gjyqtari i Gjykatës së Tiranës, Besnik Hoxha është paraqitur këtë të martë në Prokurorinë e Posaçme.
Burime për mediat bëjnë me dije se ai është thirrur nga SPAK për t’u marrë në pyetje nga oficerët e BKH-së në lidhje me dosjen e ish-kryeprokurorit të Vlorës, Aurel Zarka.
Mësohet se ish-gjyqtarit Besnik Hoxha i përmendet emri në bisedat e aplikacionit “Sky Ecc”, se mund t’i jepte zgjidhje çështjes. Njëri nga të dyshuarit e quan “Beso grupi” dhe kur bashkëbiseduesi e pyet se kush është, ai merr përgjigjen “Besnik Hoxha shkodrani”.
Burime bëjnë me dije se në SPAK do të thirren edhe katër gjyqtarë të Tiranes të përmendur për dosjen “Toyota Yaris”, ish-prokurorë dhe ish-gjyqtarë, një anëtare e KLP-së që ka qenë mes prokurorëve të dosjes “Toyota Yaris”, si dhe prokurorë Apeli.
Ish-gjyqtari Besnik Hoxha u dëbua nga sistemi i drejtësisë me vendim të Kolegjit të Posaçëm të Apelimit më 25 korrik, për shkak se kishte kryer deklarim të pasaktë dhe të pamjafueshëm të pasurisë.
