Deputetët e Partisë Demokratike kanë bojkotuar këtë të hënë edhe mbledhjen e komisionit hetimor parlamentar për hetimin e koncesioneve në shëndetësi, i cili vijon me seancat për thirrjen e dëshmimtarëve.
Ky vendim është marrë në vazhdim të aksionit opozitar pas burgosjes së deputetit Ervin Salianji, duke e konsideruar vendimin si një hakmarrje politike të Edi Ramës dhe Fatmir Xhafajt, vëllait të trafikantit të drogës Geron Xhafaj.
Të pranishëm në komision ishin vetëm socialistët, teksa mbledhja zgjati vetëm 1 minutë dhe u shty për shkak të mungesës së dëshmimtarit.
Nënkryetari i këtij komisioni, Plarent Ndreca, njoftoi se letra e dërguar nga autoritetet për pjesëmarrjen në mbledhje është kthyer mbrapsht. Sipas tij kjo ka ardhur si pasojë e adresës së gabuar që dëshmitari Mihal Tase kishte dhënë.
Ndërkohë, Partia Demokratike ka bojkotuar edhe Komisionin e Ligjeve.
