Një 40-vjeçar shqiptar është shpallur në kërkim nga policia në Selanik të Greqisë pasi gjatë arratisjes ka plagosur lehtë një prej efektivëve, të cilin e ka përplasur me makinë. Më pas ai ka hedhur në rrugë një pako me kanabis të papërpunuar me peshë 1 kilogram e 42 gram, ka braktisur mjetin aty pranë dhe është larguar me vrap.
Megjithatë, të dhënat e tij janë identifikuar dhe është shpallur në kërkim. Në makinën e cila u sekuestrua u arrestua partnerja e tij 33-vjeçare dhe nga shtëpia e tyre në një zonë të Selanikut lindor u sekuestrua një pako kokainë me peshë 5.78 gram dhe një peshore elektronike.
Ndaj 33-vjeçares dhe partnerit të saj të shpallur në kërkim është ngritur një dosje për transport droge për qëllime trafiku, ndërsa polici i plagosur është dërguar në spitalin, ku i është dhënë ndihma e parë.
