Gjykata e Posaçme e Apelit ka lënë në fuqi dënimin e dhënë nga GJKKO për ish-avokatin e shtetit, Irgen Kërçuku.
Ky i fundit është shpallur fajtor për kryerjen e veprës penale dënuar me “Korrupsioni pasiv i personave që ushtrojnë funksione publike” dhe është dënuar me 3 vjet burgim, por për shkak të gjyikimit të shkurtuar dënimi i është ulur në 2 vite burgim.
Vendimi i Apelit është marrë nga trup gjykuese e përbërë nga gjyqtarët Saida Dollani (kryesuese) dhe Florjan Kalaja e Daniela Shirka (anëtarë).
SPAK akuzon Irgen Kërçukun se ka marrë 9 milion lekë të vjetra nga Aleksandër Laho, i njohur si “Rrumi i Shijakut” për të mos marrë pjesë në procesin gjyqësor që paditësi Pal Seçuni kishte me Kadastrën në Durrës.
Rryshfeti i është dhënë avokatit të shtetit në zyrën vendore Durrës, Irgen Kërçuku, për të mos bërë në vijim ankim në Gjykatën e Apelit, për vendimin e Gjykatës së Shkallës së Parë Durrës në lidhje me një pronë.
Pasi mori shifrën prej 9 milion lekësh të vjetra nga “Rrumi”, Irgen Kërçuku nuk shkoi në gjyq duke mos apeluar në Gjykatën e Apelit vendimin e Gjykatës së Shkallës së Parë në Durrës.
Ka qenë përgjimet e qershorit të vitit 2017 që zbuluan lidhjet mes Aleksandër Lahos e Kërçukut për ryshfet.
Rrumi shfaqet duke bërë pazar dhe duke i dhënë ryshfet përfaqësuesit të Avokatit të Shtetit, Irgen Kërçuku, në mënyrë që ky i fundit të tërhiqej nga ankimi i procesit gjyqësor të tjetërsimit të 45 mijë metrave katrorë tokë publike në Gjirin e Lalzit. Ish-avokati i vënë nën hetim ka pranuar para SPAK se ka marrë 9 milionë lekë ryshfet me 2 këste, por pretendoi se kishte qenë i kërcënuar për t’i marrë ato. Madje, kur vendimi mori formë të prerë dhe nuk u bë ankimim, avokati pretendon se Rrumi i ka kërkuar t’i kthejë pas paratë.
