Ndaj të dyshuarit për përpjekjen për të vrarë ish-Presidentin Donald Trump u ngritën akuza për armëmbajtje në një gjykatë federale të hënën, një ditë pasi u pikas ndërsa fshihej me një armë në shkurret përreth fushës së golfit të ish-presidentit në Florida.
Ndërsa duket se do të ketë akuza të mëtejshme në të ardhmen, akuzat fillestare për mbajtje arme ndërsa ishte i dënuar më herët për një tjetër vepër penale, si dhe për zotërim arme me numër serie të fshirë, do t’u mundësojnë autoriteteve që ta mbajnë të dyshuarin nën arrest gjatë kohës që do të vazhdojnë hetimet.
Kandidati republikan për president në zgjedhjet e këtij viti që mbahen më 5 nëntor nuk u dëmtua fizikisht. Por, ky incident ngre pikëpyetje të reja se si dyshuari i armatosur arriti t’i afrohet, vetëm dy muaj pasi një tjetër person i armatosur hapi zjarr më 13 korrik gjatë një tubimi në Butler të Pensilvanisë, duke e plagosur ish-presidentin në veshin e djathtë.
Sipas dokumente të paraqitura në gjykatë, të dhënat telefonike tregojnë se i dyshuari mund të ketë qëndruar në pritje për gati 12 orë të shtunën.
Shërbimi Sekret hapi zjarr pasi njëri prej agjentëve pikasi grykën e pushkës që dilte nga shkurret të dielën, mbi 300 metra pranë fushës ku ish-presidenti po luante golf.
I dyshuari u largua me një makinë fuoristradë, thanë autoritetet. Oficerët e policisë gjetën të lëna pas një armë gjysmë automatike të mbushur me municion (SKS) dhe të pajisur me një dylbi snajperi, një kamera dixhitale dhe një qese plastike me ushqime.
I dyshuari, i identifikuar të hënën me emrin Ryan Routh, i moshës 58 vjeçare, u arrestua rreth 40 minuta pasi kishte udhëtuar me makinë përgjatë autostradës drejt veriut, I-95. Kur u pyet a e dinte se përse po e ndalonin, zoti Routh “u përgjigj në mënyrë pohuese”, thanë autoritetet. Targat e vendosura në automjet ishin raportuar si të vjedhura nga një makinë tjetër.
Të dhënat tregojnë se telefoni i tij kishte qëndruar pranë fushës së golfit që nga ora 01:59 e mëngjesit të së dielës.
Zoti Routh është dënuar dy herë më parë në Karolinën e Veriut. Dënimi i parë është në vitin 2002 për zotërim armësh të shkatërrimit në masë dhe në vitin 2010 për zotërim sendesh të vjedhura. Detaje të mëtejshme për këto dy çështje të mëparshme gjyqësore nuk u bënë menjëherë të ditura.
Ish-Presidenti Trump fajësoi Presidentin Joe Biden dhe Nënpresidenten, njëkohësisht kandidate demokrate për presidente, Kamala Harris për përpjekjen për atentat. Ai përmendi “retorikën” e tyre dhe tha se i dyshuari po vepronte bazuar tek “fjalori tepër provokues” i demokratëve, megjithëse autoritetet ende nuk kanë paraqitur ndonjë evidencë për motivin.
“Retorika e tyre po shkakton që mua të më qëllojnë me armë, kur jam unë ai që do ta shpëtojë vendin dhe janë ata që po e shkatërrojnë vendin – nga brenda dhe nga jashtë”, tha ai, sipas rrjetit të lajmeve Fox.
SHËRBIMI SEKRET NËN TRYSNI
Shërbimi Sekret, i cili mbron presidentët amerikanë, kandidatët për president dhe zyrtarë të tjerë të nivelit të lartë, është vendosur në epiqendër të vëmendjes që kur ndodhi atentati i parë ndaj ish-Presidentit Trump.
Sulmi i parë solli dorëheqjen e drejtores së këtij shërbimi, Kimberly Cheatle. Shërbimi Sekret shtoi masat e sigurisë për ish-Presidentin Trump pas sulmit të 13 korrikut, gjatë të cilit autori u vra nga agjentët e sigurisë.
Agjencia “ka nevojë për më shumë ndihmë”, përfshirë ndoshta më shumë personel, u tha Presidenti Biden gazetarëve të hënën, duke shtuar se: “Falenderoj Zotin që (ish)presidenti është OK”.
Nënpresidentja Harris shkruajti në rrjetin social X: “Dhuna nuk ka vend në Amerikë”.
Kryetari i Dhomës së Përfaqësuesve, Mike Johnson, i cili ka krijuar një grup pune dypartiak që kur ndodhi atentati i parë, i tha kanalit të lajmeve Fox News gjatë një interviste se Kongresi do të shqyrtojë edhe incidentin e fundit.
“Na duhet llogaridhënie”, tha zoti Johnson, duke bërë thirrje për më shumë burime për të mbrojtur ish-Presidentin Trump. “Duhet të kërkojmë që kjo të realizohet”.
Ronald Rowe, zëvendësuesi i drejtores së dorëhequr të Shërbimit Sekret, udhëtoi drejt Floridas pas tentativës për vrasje, raportuan disa media. Zoti Rowe, i cili mori përsipër drejtimin në korrik, i tha Kongresit më 30 korrik se ndjehej “i turpëruar” nga mangësitë e sigurisë në atentatin e mëparshëm.
Zoti Rowe ka qenë pjesë e Shërbimit Sekret për 25 vite, thuhet në biografinë e tij zyrtare, dhe ishte emëruar zëvendësdrejtor përpara se t’i lihej drejtimi i përgjithshëm në muajin korrik.
I DYSHUARI ËSHTË SIMPATIZANT I UKRAINËS
Zoti Routh ishte mbështetës i fortë i Ukrainës dhe pati udhëtuar drejt këtij vendi pas sulmit të filluar nga Rusia në vitin 2022. Ai ishte përpjekur të rekrutonte luftëtarë të huaj.
Profilet me emrin e tij në rrjetet X, Facebook dhe LinkedIn përmbajnë mesazhe mbështetjeje për Ukrainën, si dhe deklarata ku përshkruhet ish-Presidenti Trump si rrezik për demokracinë.
Disa prej këtyre profileve iu hoq qasja për publikun pak orë pas incidentit të së dielës.
Nënpresidentja Harris dhe drejtues të tjerë demokratë e kanë paraqitur ish-Presidentin Trump si një rrezik për demokracinë amerikane, duke përmendur përpjekjet e tij për të përmbysur humbjen në zgjedhjet e vitit 2020, të cilat çuan në sulmin ndaj Kapitolit në 6 janar 2021. Zonja Harris ka premtuar mbështetje të palëkundur për Ukrainën, nëse zgjidhet presidente.
Ish-Presidenti Trump ka shprehur skepticizëm për volumin e ndihmave që Shtetet e Bashkuara i kanë ofruar Ukrainës dhe është zotuar t’i japë fund luftës menjëherë, nëse rizgjidhet. Vitin e kaluar, ai i tha agjencisë së lajmeve Reuters se Ukrainës mund t’i duhet të lëshojë territor për të arritur paqen.
Elon Musk, pronari miliarder i rrjetit X, fillimisht publikoi dhe në vazhdim fshiu një mesazh nga media sociale të dielën, ku ngrinte pyetjen se përse askush nuk ishte munduar të vriste Presidentin Biden apo Nënpresidenten Harris. Me një postim pasues të hënën, zoti Musk, i cili ka dhënë mbështetje për kandidaturën e zotit Trump, tha se kishte bërë shaka./VOA
