Superliga e volejbollit të meshkujve ka ngritur dje siparin e edicionit 2024-2025 me dy ndeshjet e para të kampionatit.
Sfida hapëse e sezonit të ri u zhvillua në Korçë, takim që vendosi përballë Skënderbeun dhe Teutën. Vendësit nuk falën në “Tamara Nikolla”, teksa morën 3 pikët e para, duke i mundur bregdetarët me rezultatin 3-1 në një takim që zgjati 1 orë e 39 minuta.
Fitorja për ekipin korçar erdhi me përmbysje, pasi Teuta e nisi më mirë ndeshjen, duke fituar setin e parë 23-25. Megjithatë, më pas të zotët e shtëpisë dominuan, duke marrë bindshëm tri sete, përkatësisht në shifrat 25- 16, 25-13 dhe 25-14.
Fillim i mbarë edhe për Studentin, me kryeqytetasit që kaluan Elbasanin në transfertë me rezultatin e pastër 0-3 në një përballje që zgjati 1 orë e 15 minuta.
Me gjithë përpjekjet e vendësve, kualiteti dhe organika më e plotë e skuadrës studentore bënë diferencën. Kështu miqtë e treguan forcën që në setin e parë, në të cilin fituan 20-25. Skuadra e drejtuar nga Kestrin Batalli ishte edhe më shumë dominuese në setin e dytë, duke fituar thellë 15-25.
Studenti mori edhe setin e tretë në shifrat 21- 25 për të hipotekuar suksesin 0- 3 dhe 3 pikët e para në kampionat.
Java e parë do të kompletohet sot me derbin mes kampionëve në fuqi të Partizanit dhe Tiranës në orën 19:00 në “Asllan Rusi”.
