Flamurtari triumfoi bindshëm ditën e sotme ndaj Vorës me rezultatin 3-0 në supersfidën e javës së tretë të Kategorisë së Parë.
Golat e Oshafit, Ememes dhe Pjeshkës i dhuruan 3 pikë të arta skuadrës së Agostinelit në duelin ndaj rivalëve direkt të Vorës, të cilët vinin pas 2 fitoresh radhazi.
Pjesa e parë nuk kishte asnjë rast të pastër deri në minutën e 37-të. Ishte pikërisht ajo minutë kur Oshafi dërgoi topin në rrjetë, me Flamurtarin që mbylli në avantazh 45 minutat e para.
Me nisjen e pjesës së dytë, Flamurtari ishte përsëri më kërkues dhe filloi dominimin. Për golin e dytë mendoi Ememe në minutën e 73-të, i cili përfitoi nga një pasiguri e portierit të Vorës.
Ndërsa, golin që vulosi sfidën atë të 3-tin e shënoi Denis Pjeshka në minutën e 80-të.
Me këtë fitore, vlonjatët shkojnë në vendin e dytë me 6 pikë, në krahun tjetër, Vora mbetet në vendin e 3-të po me 6 pikë, duke marrë humbjen e parë për këtë sezon.
