Marvin Çuni është bashkuar me Rubin Kazan në Rusi. Klubi italian, Frosinone, nëpërmjet një postimi në kanalet zyrtare, ka njoftuar se ka shitur kartonin e sulmuesit shqiptar te ekipi rus.
“Frosinone Calcio njofton se ka arritur marrëveshje me klubin sportiv Klub Rubin Kazan për shitjen e futbollistit Marvin Cuni. Sulmuesi i lindur në vitin 2001 kalon te kjo skuadër në mënyrë përfundimtare” – shkruan klubi.
Për transferimin e Çunit, Rubin Kazan, shpenzoi plot 2 milionë euro, me shpresën që sulmuesi shqiptar do të ketë të njëjtin impakt si Mirlind Daku, që është shndërruar në një lider.
Sulmuesi ka firmosur një kontratë 4-vjeçare, pra të vlefshme deri në vitin 2028.
