Roja bregdetare italiane gjeti gjashtë trupa në brigjet e Siçilisë, që besohet se janë disa nga 21 të zhdukurit nga një anije e mbytur me emigrantë në fillim të këtij muaji, njoftuan mediat italiane të dielën.
Roja bregdetare tha të mërkurën se shtatë persona, të gjithë shtetas sirianë, u morën nga një varkë gjysmë e mbytur në jugperëndim të ishullit Lampedusa pas një mbytjeje anijeje.
Të mbijetuarit u thanë shpëtimtarëve se ishin nisur nga Libia më 1 shtator dhe se 21 nga 28 personat në bord, duke përfshirë tre fëmijë, kishin rënë në det për shkak të motit të ashpër.
Agjencia italiane e lajmeve AGI raportoi se shpëtimtarët besojnë se gjashtë trupat janë disa nga 21 të zhdukurit nga mbytja e anijes, bazuar në koordinatat se ku u gjetën.
Mesdheu qendror është ndër rrugët më vdekjeprurëse të migrimit në botë. Sipas agjencisë së migracionit të OKB-së (IOM), më shumë se 2,500 migrantë vdiqën ose u zhdukën duke tentuar kalimin vitin e kaluar, dhe 1,116 që nga fillimi i vitit.
