Ministri i Brendshëm Ervin Hoxha ka njoftuar paraditen e sotme çeljen e një konkursi për të emëruar drejtuesin e ri të Policisë së Shtetit.
Pas largimit të Muhamet Rrumbullakut, deri në emërimin e drejtuesit të ri, Sokol Bizhga është komanduar në këtë post.
“Në bazë të këtij ligji kam nxjerrë Udhëzimin për fillimin e procedurave të përzgjedhjes së Drejtorit të Përgjithshëm të Policisë së Shtetit dhe në zbatim të tij, në detyrën e përkohshme të drejtuesit të lartë të Policisë, do të komandohet Zv.drejtori i Përgjithshëm, Sokol Bizhga”, tha Hoxha.
Ministri Hoxha paralajmëroi ndryshime në gjithë kupolën drejtuese të policisë së shtetit.
“Sot, është dita për ta kaluar stafetën tek një tjetër gjeneratë drejtuesish, të cilët falë punës kolosale të bërë deri këtu, nuk do ta fillojnë rrugën e tyre nga gremina e vitit 2013, por nga një lartësi e arritur me mundin e me kohën e një dekade dhe nuk do të kenë asnjë justifikim për të mos e ngjitur Policinë e Shtetit në rangun e trupave më të mira të Bashkimit Europian.
Kam bindjen se ata që do të dorëzojnë stafetën udhëheqëse të kësaj trupe, që nga Drejtori i Përgjithshëm dhe të gjithë të tjerët, nuk do ta kursejnë dijen dhe përvojën e jashtëzakonshme të fituar në gjithë këto vite në vijën e parë, për të mbështetur ngjitjen e mëtejshme të trupës së policisë drejt majës së Shqipërisë 2030.“- tha ndër të tjera Hoxha.
LEXO EDHE:
Kërcënimi ndaj medias/ A po trimërohet kryepolici Rrumbullaku para shkarkimit?
