Një shqiptar është gjetur i plagosur nga kalimtarë të rastit në orët e para të mëngjesit të kësaj të shtune në Irakleo të Kretës në Greqi
Mediat vendase raportojnë se bëhet fjalë për një 40-vjeçar, identiteti i të cilit ende nuk dihet, i cili ka patur një plagë në këmbë të shkaktuar me armë zjarri dhe është transportuar në spitalin Pagni të Kretës ku ndodhet jashtë rrezikut për jetën.
Fillimisht policia greke dyshoi se ngjarja kishte lidhje me një konflikt për motive të dobëta të ndodhur në një klub nate në zonën e Agiou Kostantinou në Irakleo, por dëshmia e të plagosurit e ka mbuluar ngjarjen me mister.
Sipas tij, ai ka qenë duke parkuar automjetin jashtë banesës, kur persona të maskuar e kanë rrëmbyer dhe pasi e kanë çuar në një vend tjetër, e kanë qëlluar me armë zjarri në këmbë dhe e kanë braktisur.
40-vjecari shqiptar shprehet se nuk ka arritur të identifikojë asnjë nga autorët, ndërkohë sipas policisë ai rezulton të ketë pasur kërcënime të mëparshme.
