Nëse ka një klub në Shqipëri që di se si të përfitojë më së miri nga shitja e lojtarëve, ai është Skënderbeu.
Korçarët kanë shitur së fundmi edhe sulmuesin e tyre kryesor Ermir Rashica, pasi burime për mediat bëjnë me dije se kanë arritur të gjejnë dakordësinë me gjigantët belg të Anderlecht.
Bëhet fjalë për një shumë të konsiderueshme që do të derdhen në arkat e bardhekuqëve, por ende nuk dihet shifra konkrete, që pritet të mësohet ditët në vijim.
Sulmuesi nga Kosova që luan me Shpresat kuqezi, do të luajë ndeshjen me fanellën e Skënderbeut të dielën kundër Partizanit dhe më pas do të udhëtojë drejt Belgjikës.
Për Rashicën mësohet se kishte interesim konkret edhe nga një ekip polak, por drejtuesit e Skënderbeut kanë gjetur dakordësinë me klubin e Anderlecht.
20-vjeçari sezonin e shkuar bëri një sezon dinjitoz me Skënderbeun, ku në 36 ndeshje, shënoi 8 gola duke spikatur me talentin e tij.
Këtë sezon ai mori numrin 10 mbi shpinë me fanellën e Skënderbeut, duke marrë më shumë përgjegjësi mbi vete, por duket se do e veshë vetëm në dy ndeshje zyrtare.
Rashica është shitja e pestë e Skënderbeut në këtë merkato vere, pas transferimit të Nnamdi Franklin Ahanonu tek ekipi i Astanës, Ivan Djantou tek Sonderjyske në Danimarkë, Dean Liços tek Igdir FK në Turqi dhe Randy Dwumfour në Arabi.
