Arbnor Muçolli i cili po shkëlqente me Goteborg në Suedi, detyrohet të ndalet për një periudhë të gjatë tashmë, pasi ka dëmtuar ligamentin e gjurit dhe duhet t’i nënshtrohet një ndërhyrje kirurgjikale.
Trajneri Silvinjo nuk e ka fshehur admirimin për futbollistin dhe vetëm një dëmtim pak javë para fillimit të Euro 2024 ia hoqi atij mundësinë të ishte në listën e futbollistëve të grumbulluar për aktivitetin.
Më pas, Muçolli u kthye në fushën e lojës me ekipin e tij dhe po luante me rregullsi.
Por disa ditë më parë ai ka ndrydhur gjurin në pjesën e parë të ndeshjes në kampionat dhe u desh të linte mes dhimbjeve fushën e lojës.
Testet konfirmuan më të keqen, dëmtimin e ligamentit kroçiat dhe nevojën për të kryer një ndërhyrje kirurgjikale që do e lërë larg futbollit deri në vitin 2025.
“Unë ndjeva shumë dhimbje menjëherë sapo ndodhi dhe e kuptova që nuk ishte aspak e mirë. Kur mora mesazhin se çfarë ishte, ishte ndjesi e vështirë dhe kanë qenë disa ditë të vështira. Por tani po pres me padurim ndërhyrjen kirurgjikale dhe të luftoj të kthehem përsëri i fortë në vitin 2025”, tha mesfushori ofensiv shqiptar.
