Një hap i madh në karrierë për sulmuesin e talentuar Albin Berisha.
Futbollisti kosovar, ka firmosur me klubin e njohur gjerman të Hansa Rostock, duke iu bashkuar skuadrës e cila luan në këtë sezon në kategorinë e tretë.
Albin Berisha e nisi karrierën e tij mes profesionistëve pikërisht në Superiore, me fanellat e Kukësit dhe Laçit, para se të transferohej në Kosovë ku luajti me Besën, Ballkanin, Lirinë dhe Malishevën, para se transferohej te rumunët e Petrolul në fillimin e këtij viti.
Tani për të ka ardhur momenti që të hedhë një hap të rëndësishëm pasi qendërsulmuesi 23-vjeçar, ka firmosur me klubin i cili në të kaluarën ka qenë pjesë e elitës së futbollit gjerman dhe po tenton të kthehet atje nën drejtimin e trajnerit të njohur Bernd Holerbah.
“Për mua dhe familjen time është diçka speciale që të luaj futboll në Gjermani dhe për një klub kaq të madh. Në ditët e fundit kam pritur me padurim për transferimin që të finalizohej dhe jam shumë i lumtur që jam këtu. Me punë dhe pasion dua që të ndihmoj ekipin dhe të lumturoj tifozët”, ishin fjalët e Berishës pas prezantimit të tij.
