Një 20-vjeçar ka rënë në prangat e policisë pasi duke e kërcënuar me thikë ka tentuar t’i vjedhë çantën një turisti nga Italia.
Amarildo Dani, banues në Bulqizë dhe rezident në Itali, nuk arriti që ta çonte deri në fund tentativën e tij, pasi turisti italian u largua menjëherë me automjetin e tij.
“Shërbimet e Komisariatit të Policisë Durrës, pas marrjes së njoftimit se një shtetas, duke përfituar nga errësira në një rrugë në lagjen nr. 13, Durrës, nën kërcënimin e thikës kishte tentuar të vidhte çantën e një turisti italian, i cili ishte duke lëvizur me automjetin e tij, por nuk kishte mundur t’ia merrte, pasi shtetasi italian ishte larguar me automjetin e tij, organizuan punën për identifikimin dhe kapjen e autorit të dyshuar.
Bazuar në rezultatet e hetimit dhe në provat e siguruara, u bë i mundur identifikimi dhe arrestimi i autorit të dyshuar, shtetasit Amarildo Dani, 20 vjeç, banues në Bulqizë dhe rezident në Itali.”-njofton policia.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.
