Koordinatori për Programin Ekonomik në PD, Dorjan Teliti, ka publikuar disa foto që faktojnë se plazhet në jug të vendit janë bosh.
Në postimin e tij në Facebook, Teliti shprehet se turizmi nuk rritet me propagandë videosh 4K, por me investime, masa konkrete dhe politika taksimi të duhura, për të nxjerrë në pah avantazhet konkurruese të vendit!
“Një qeveri e përgjegjshme duhet të ketë vizion, të japë mbështetje, të kryejë investime publike të nevojshme, të ngrejë shkolla profesionale për sektorin, të aplikojë një sistem taksimi të njëjtë për të gjithë operatorët e tregut, e jo të bëjë vetëm video me drona 4K duke u krenuar thjesht me “dhuratën e mrekullive të natyrës“, shkruan ai.
Postimi i plotë:
Ku turizmi? Propaganda vs Realiteti!
Propaganda: numri i turistëve më i lartë se vitin e kaluar.
Realiteti: shikoni pamjet miq nga plazhi i Zvernecit (pamje që i ndesh edhe në zona të tjera në jug të vendit).
Në kulm të sezonit, në orar mesdite, turistët numërohen me gishtat e dorës.
Operatorët turistikë, marketet dhe sidomos restorantet ankohen për rënien e ndjeshme të konsumit, rënie që në varësi të zonave të ndryshme në jug të vendit, varion nga -10% deri ne -40% krahasuar me vjet.
Propaganda: kemi tre muaj të verës plot e përplot me turistë.
Realiteti: turizmi vendas në dorë vetëm të dy ditëve të fundjavës, ditët e tjera të ngjashme me këto pamje.
Një qeveri e përgjegjshme duhet të ketë vizion, të japë mbështetje, të kryejë investime publike të nevojshme, të ngrejë shkolla profesionale për sektorin, të aplikojë një sistem taksimi të njëjtë për të gjithë operatorët e tregut, e jo të bëjë vetëm video me drona 4K duke u krenuar thjesht me “dhuratën e mrekullive të natyrës”.
Një arsye më shumë për të sjellë ndryshimin, për të kthyer sa më shpejt vëmendjen te avantazhet konkurruese të Shqipërisë!
