Policia e Lezhës pas hetimeve të Prokurorisë ka zbuluar një lokal, i cili ishte përshtatur për ushtrimin e prostitucionit dhe për shitjen e drogave të forta.
Si rezultat në kuadër të operacionit policor të koduar “Fazani” janë arrestuar 6 persona dhe një tjetër është shpall në kërkim. Në pranga është vënë pronari i lokalit, shtetasi Krenar (Bashkim) Lika, 46 vjeç, banues në Malbardhe, Kurbin, për veprat penale “Mbajtja e lokaleve për prostitucion”, “Shfrytëzimi i prostitucionit” dhe “Prodhimi dhe shitja e narkotikëve”.
Gjithashtu është arrestuar në flagrancë dhe shtetasja Blerina Leti, 42 vjeçe, banuese në Bulqizë, e cila ushtronte prostitucionin në lokal dhe akuzohet për veprën penale “Prostitucioni”.
Po ashtu është ndaluar dhe shtetasi Ahmet Rizvani, 32 vjeç, banues në Tiranë, i cili shiste dozat e lëndëve narkotike dhe akuzohet për veprën penale “Prodhimi dhe shitja e narkotikëve”, kryer në bashkëpunim.
Uniformat blu kanë ndaluar dhe tre shtetaset Alketa Volaj, 37 vjeçe, banuese në Lezhë, Vjollca Haka, 30 vjeçe, banuese në Prishtinë dhe Klaudia Oshafi, 20 vjeçe, banuese ne Laç, për veprën penale “Moskallëzimi i krimit”.
Në kërkim është shpallur shtetasi K. K., 23 vjeç, banues në Kurbin, bashkëpunëtor për shitjen e lëndëve narkotike, i cili akuzohet për veprën penale “Prodhimi dhe shtija e narkotikëve”, kryer në bashkëpunim.
Policia ka sekuestruar doza të lëndëve narkotike kokainë dhe heroinë, që u gjetën në lokal, 8000 euro, 9 aparate telefoni, dhe një automjet.
“Nga veprimet hetimore dhe veprimet operacionale të kryera gjatë operacionit është zbuluar se shtetasi Krenar (Bashkim) Lika e kishte përshtatur lokalin e tij, për ushtrimin e prostitucionit dhe për shitjen e lëndëve narkotike. Gjatë kontrollit në ambientet e lokalit u gjetën dhjetëra doza të lëndëve të dyshuara narkotike kokainë dhe heroinë, të cilat u sekuestruan në cilësinë e provës materiale, bashkë me shumën 8000 euro dhe një automjet.” -thuhet në njoftimin e Policisë.
Autoritetet raportojnë se vijojnë hetimet për dokumentimin e plotë të këtyre veprimtarive kriminale. Materialet procedurale i kaluan Prokurorisë, për veprime të mëtejshme.
