Forcat e sigurisë në Venezuelë kanë hedhur gaz lotsjellës dhe plumba gome ndaj njerëzve që protestojnë për rezultatin e diskutueshëm të zgjedhjeve të së dielës. Mijëra njerëz zbritën në qendrën e kryeqytetit të hënën në mbrëmje.
Protestat shpërthyen në kryeqytetin e Venezuelës një ditë pasi presidenti Nicolás Maduro pretendoi se kishte fituar.
Opozita e ka kundërshtuar shpalljen e fitores së Maduros si mashtruese, duke thënë se kandidati i saj Edmundo González fitoi bindshëm me 73.2% të votave.
Partitë opozitare ishin bashkuar pas zotit González në një përpjekje për të rrëzuar presidentin Maduro pas 11 vitesh në pushtet, mes pakënaqësisë së përhapur për krizën ekonomike të vendit.
Një numër vendesh perëndimore dhe të Amerikës Latine, si dhe organizma ndërkombëtarë, përfshirë OKB-në, u kanë bërë thirrje autoriteteve venezueliane që të publikojnë të dhënat e votimit nga qendrat e votimit individual.
Argjentina ka refuzuar të njohë fitoren zgjedhore të presidentit Maduro, dhe si përgjigje Venezuela ka tërhequr diplomatët nga Buenos Aires.
Diplomatët nga gjashtë vende të tjera të Amerikës Latine, Kili, Kosta Rika, Panamaja, Peruja, Republika Domenikane dhe Uruguai, janë tërhequr gjithashtu.
Qeveria e Venezuelës njoftoi gjithashtu një pezullim të përkohshëm të fluturimeve ajrore komerciale për dhe nga Venezuela me Panamanë dhe Republikën Domenikane duke filluar nga ora 20:00 me orën lokale të së mërkurës.
Një prani e madhe ushtarake dhe policore, ishte në rrugët e Karakasit me qëllim që të shpërndante protestuesit dhe t’i pengonte ata të afroheshin te pallati presidencial.
