Deputeti demokrat Agron Gjekmarkaj ka reaguar në lidhje me zjarrin që ka përfshirë malin e Rrencit dhe të Shëngjinit. Gjekmarkaj deklaron se zjarri po merr përmasa dramatike, ndërsa ndërhyrja është modeste.
Ai deklaron më tej se mosveprimi po shndërrohet në krim mjedisor dhe i bëri thirrje Kryeministrit Edi Rama dhe ministrit të mbrojtjes Niko Peleshi t’i përgjigjen apelit për të ndërhyrë ushtria dhe çdo institucion që mund të jetë i dobishëm.
“Zjarri në Malin e Rrencit e të Shëngjinit po merr përmasa dramatike. Flakët dhe tymi janë kudo rreth qytetit si rrezik real i çastit por edhe pak më afatgjatë për shëndetin!
Deri tani përpjekjet për ta shuar kanë qenë modeste. Duhet ndërhyrje urgjente jo vetëm nga pushteti lokal por nga qeveria qendrore me çdo mjet, mundësisht me helikopter nga ajri.
Nuk ka më kohë për propagandë. Mosveprimi po shndërrohet në krim mjedisor , në rrezik për jetën e pronat në kulmin e sezonit turistik. I bëj thirrje Kryeministrit Edi Rama , ministrit të mbrojtjes Niko Peleshi t’i përgjigjen apelit për të ndërhyrë ushtria dhe çdo institucion që mund të jetë i dobishëm. Nuk duhen fjalë dhe mbi të gjitha jo gënjeshtra por lëvizje menjëhere e Qeverise dhe Shtetit nëse kemi ënde të tilla në të vërtetë e jo në sporte propogande.
Shtëllungat e tymit kanë zëvendesuar retë ! Banoret po thithin tym. Zjarri nuk po djeg vetëm pemë e shkurre por edhe seriozitetin e emergjencave civile dhe gadishmërinë për të reaguar. Nesër do jetë vonë. Sonte duhet bërë diçka. Afër portit punë orësh po afrohet një vatër e re zjarri. Pasojat merren me mend!”- shkruan Gjekmarkaj.
