Policia e Korçës arrestoi mëngjesin e sotëm 41-vjeçarin Selami Hyka nga fshati Leminot i Maliqit, i cili akuzohet se ka kryer marrëdhënie seksuale me dhunë me një 16-vjeçare dhe i ka dhënë para, ndërsa në pranga u vu dhe 26-vjeçari Marsel Baçi nga fshati Podgorie e Maliqit, i cili akuzohet si tutor i 16-vjeçares, duke e shfrytëzuar të miturën për prostitucion.
Në një prononcim për mediat, Shega Baçi, e ëma e Marsel Baçi deklaron se ishte vajza e mitur ajo e cila i shkruante vazhdimisht. Ajo shtoi se ata janë në gjendje të vështirë ekonomike dhe se nuk është e vërtetë që djali i saj e shfrytëzonte për prostitucion.
Sipas të ëmës së Marsel Baçit, fajet i ka 16-vjeçarja, pasi sipas saj, ajo ka ngatërruar dhe shumë djem të tjerë.
“Marseli me atë vajzën nga Leminoti, ajo e merrte, i fliste. Ajo e kishte fajin vet, ka ngatërruar shumë çuna. Nuk ka bërë gjë Marseli, nuk kam djem të atillë, nuk kemi bukë të hamë. Ja ku jetojmë me një dhomë. Vajza i shkruante edhe djalit tim tjetër, por ai e shau. Nuk ia zgjati. Ajo e tillë është. Të gjithë e shajnë. Ajo nuk është njeri. Marseli me ka folur për vajzën, i thashë mos u ngatërro, ai thoshte që ajo vetë i shkruante. Unë fola njëherë me vajzën i thashë mos më ngatërro djalin. Ajo ia jepte fb, numrin vet. Marseli është i pafajshëm. Të gjithë në Leminot e njohin”, tha Shega Baçi.
