Anëtari i Kryesisë së Partisë Demokratike, Belind Këlliçi, në një deklaratë për mediat para SPAK, ka denoncuar me dokumente se si bashkia e Tiranës i jepte punët kompanisë së drejtorëve të bashkisë, e quajtur ‘5D’.
Këlliçi deklaron se kompania ‘5D’ ka shkatërruar dhjetëra pallate në Tiranë më justifikimin e tërmetit të vitit 2019, por në fakt shkatërrimet janë bërë vetëm për të larguar banorët nga zona dhe për të ndërtuar pallate të reja, që shiten me çmime të larta.
Sipas Këlliçit, aktmarrëveshja e lidhur mes Bashkisë Tiranë dhe kompanisë “5D”, dikur e quajtur “Vas Construction”, është bërë në dhjetor të vitit 2021.
“Kjo aktmarrëveshje është firmosur me qëllim prishjen e 13 pallateve me justifikimin e dëmtimi nga tërmeti i 2019. Ndërkohë që Mazniku hante biftek 1000 euro në Dubai, keni parë protestat e qindra familjeve që nxirreshin prej leckash nga shtëpitë e tyre”, deklaroi ai.
Kontratën e nënshkruar nga Arbjan Mazniku, Këlliçi e ka ngjitur në dyert e SPAK që prokurorët e Prokurorisë së Posaçme ta shikojnë kur të hyjnë dhe të dalin e të kuptojnë se, çfarë dëmi u është shkaktuar qytetarëve të Tiranës nga bashkia e drejtuar nga Erion Veliaj.
Deklarata e plotë:
Të nderuar qytetarë,
Sot organizata partnere e “Rilindjes”, drejtuar nga Altin Dumani po zbaton porosinë e radhës së kolegut të tyre, hajdutit Erion Veliaj, duke thërritur në SPAK, Arbjan Nusret Maznikun.
Sipas vendimit të Gjykatave të Shkallës së Parë dhe të Apelit të Krimeve të Rënda, Klodian Braho nuk gjente dot, se kush ishte titullari që kishte firmosur tenderat e kompanisë së Grupit të Strukturuar Kriminal 5D Konstruksion.
Jam sot përpara jush për të ndihmuar kolegët e Erionit. Ky dokument që shihni, është Akt-Marrëveshja e firmosur mes Bashkisë së Tiranës dhe kompanisë 5D, dikur e quajtur V.A.S Konstruksion.
Kjo Akt-Marrëveshje u firmos me qëllim prishjen e të paktën 13 pallateve në Tiranë, me justifikim e dëmtimit nga tërmeti i vitit 2019.
Kjo Akt-Marrëveshje kriminale është firmosur nga vetë Arbjan Mazniku në cilësinë e Titullarit të Autoritetit Kontraktor.
Të nderuar qytetarë,
Me sa duket kolegët e Erionit, nuk e shohin pronarin tjetër të 5D, i cili jo vetëm ka firmosur këtë marrëveshje, por e ka shtyrë afatin e saj disa herë, për të favorizuar kompaninë 5D dhe pazaret e tjera për ndërtimet e radhës.
Këtë Akt-Marrëveshje autentike po ia u lëmë sot kolegëve të Erionit përpara zyrave të tyre, që të kuptojnë se tentativa e tyre për amnistimin e Erion Hajdut Veliajt dhe Arbjan Nusret Maznikut, do të dështojë me sukses të plotë.
Ju faleminderit.
