Kompleksti turistik “Thymus”, i cili përmban 2 hotele dhe një fshat turistik me 38 vila dy-tre katëshe që po ndërtohet në Dhërmi, do të shtojë me 2,336 metra katrorë sipërfaqen e ndërtimit. Vendimi për ndryshimin e projektit është marrë 5 vite pasi subjekti mori statusin e investitorit strategjik, në vitin 2019.
Këshilli Kombëtar i Territorit me një vendim të prillit të këtij viti, ka vendosur jo vetëm që investitori të ndryshojë projektin, por të miratojë edhe ndryshimin e zhvilluesit të tij.
Duke krahasuar planvendosjen e vitit 2019, kur Ilir Trebicka mori statusin e investitorit strategjik me kusht, me atë të vitit 2024 vihet re se ndryshime në numrin e kateve do të pësojnë dy hotelet, që do të konvertohet edhe në shtim të sipërfaqes ndërtimore.
Një tjetër ndryshim thelbësor është ai i zhvilluesit të këtij projekti. Nëse më parë Ilir Trebicka kishte marrë përsipër ndërtimin e “Hotel Chaonians Deluxe” një hotel me 4 yje, për një vlerë 5.5 mln euro, tashmë porositës dhe zhvillues do të jenë “Drimadhes I&I”, “Chaonian” Sh.p.k dhe Kristaq Duni.
Ajo që e bën të dyshimtë këtë lëvizje është fakti se Ilir Trebicka ia ka “shitur” vetes investimin strategjik, pasi ai zotëron 51% të kuotave të “Drimadhes”, ndërsa 49% zotërohen nga Ilir Hoxhallari. Ky i fundit zotëron 50% të aksioneve te kompania tjetër “Chaonian”.
Pavarësisht vendimit të KKT-së për ndryshimin e zhvilluesit, në Qendrën Kombëtare të Biznesit as Ilir Trebicka dhe as kompania “Drimadhes I&I”, nuk kanë depozituar deri më tani ndonjë dokument që të vërtetojë këtë transaksion.
Referuar adresës që lexohet në vulat e kompanive, mbi maketin e ndryshimeve të depozituar pranë KKT-se, të treja kompanitë “Drimadhes I&I”, “Chaonian” Sh.p.k dhe ajo projektuese “Trema” kanë të njëjtën adresë.
Ndërkohë, tre ditë më parë u publikua një raport i Departamentit Amerikan të Shtetit (Dash) për klimën e investimeve në Shqëipëri, ku kritikohej ligji për investimet strategjike. Sipas këtij raporti, ligji nuk kishte përmbushur misionin për të thithur investitorë të thuaj, por ai kishte shërbyer për të favorizuar biznese të lidhura ngushtë me qeverinë.
“Betonizimi i jugut”, investitorët strategjikë morën 5.8 milion m2 tokë
Betonizimi i jugut nga investimet strategjike është raportuar edhe më herët nga Citizens.al. Nga të dhënat e grumbulluara një vit më parë rezultonte se qeveria shqiptare u kishte dhënë 5.8 milionë metër katror tokë investitorëve strategjikë në të gjithë vendin. Nga këto 17 projekte janë në bregdet, të dhëna përmes ligjit për Investimet Strategjike të miratuar në 2015.
Në bregdetin e jugut ata përfituan rreth 1.6 milionë metër katror sipërfaqe, ndërsa afro 4 milionë metër katror ishin dhënë deri në vitin 2023, që prekin bregdetin, ku përfshihen edhe zona e Durrësit, Kepi i Rodonit, Gjiri i Lalëzit dhe Divjaka.
Komiteti i Investimeve Strategjike (KIS), i cili jep vendimet për shpalljen e investitorëve udhëhiqet nga kryeminsitri Edi Rama dhe ministrat e kabinetit.
Ligji kishte si qëllim primar të vetin kur u hartua, thithjen e investimeve të huaja direkte nga jashtë. Por nga 2016 deri në 2023 vetëm dy projekte janë lëshuar për investitorë të huaj, dhe katër janë të përbashkëta. Pjesa tjetër janë vetëm investitor vendas./Citizens
