47-vjeçari Marsel Çela ishte një prej viktimave aksidentale të masakrës së Memaliajt të regjistruar mesnatën e kaluar, teksa ndodhej si klient në lokalin ku ndodhi atentati.
Bashkë me të humbi jetën dhe kamarieri i lokalit, 36-vjeçari Gledio Muka, të cilin po ashtu u zunë rastësisht plumbat e kallashnikovit. Viktimë mbeti edhe 74-vjeçari Shyqyri (Shyqo) Kalemi, i cili ishte dhe shënjestra e atentatit, ndërsa u plagos vëllai i tij, Artur Kalemi 57 vjeç, i cili ishte ulur në të njëjtën tavolinë me viktimën.
Në një prononcim për Tch, vëllai i Marsel Çelës thotë se ky i fundit nuk kishte asnjë lidhje me krimin, pasi sipas tij, ai shihte punën e vet dhe la pas dy prindër të sëmurë.
Vëllai i Marsel Çelës paralajmëron vetëgjyqësi, ku sipas tij, nëse shteti nuk arrin të gjejë autorët, atëherë ata do e zgjidhin vetë.
“Vëllai im është i pafajshëm. Doli të pinte kafe. Shikonte punën e tij. Punonte në Vlorë. La pas dy prindër të moshuar e të sëmurë. Shteti të verë dore. Të gjejë një orë e më parë autorët.
Po nuk i gjeti, do na detyrojë të vemë një shirit në krah e ta zgjidhim vetë. Flasim për dy jetë të pafajshme. As kamarieri s’ka asnjë faj. Punonte për bukën e gojës” – shprehet vëllai i Marsel Çelës.
Shyqyri Kalemi është babai i Andrea alias Adriatik Kalemi dhe Zamir Kalemit të cilit iu kanë shpëtuar tre atentateve të mëparshme. Ndërsa Artur Kalemi është xhaxhai i tyre. Një prej pistave ku po heton Policia është hakmarrja ndaj Andrea (Adriatik) Kalemit.
