Kandidati i opozitës për kreun e Bashkisë së Himarës, Petro Gjikuria do të nisë ditën e sotme (17 Korrik) fushatë elektorale për zgjedhjet e 4 Gushtit.
Takimin e parë ai do ta mbajë në Himarë Fshat në orën 19:30, teksa në ftesën e tij, Gjikuria fton qytetarët e Himarës që të bashkëbisedojnë për vizionin dhe për programin për drejtimin e Bashkisë.
Ndërkohë, ditën e djeshme, Petro Gjikuria ka qenë në Tiranë ku ka zhvilluar një takim me Sekretarin e Përgjithshëm të Partisë Demokratike, Flamur Noka, ku në fokus të diskutimeve bën me dije se ka qenë programi që ata do të kenë për Bashkinë e Himarës.
“Në kuadër të kandidimit tim për Bashkinë Himarë, sot, më datë 16 korrik pata disa takime në Tiranë. Ndër të tjera, u takova me Sekretarin e Përgjithshëm të Partisë Demokratike, z. Flamur Noka, me të cilin biseduam për prioritetet e programit tonë për Bashkinë, si dhe për takimin elektoral të ditës së nesërme në orën 19:30, në Himarë Fshat. Bashkojmë forcat për të nesërmen e Bashkisë Himarë!” – shkruan Gjikuria në rrjetet sociale.
Përballë Petro Gjikurisë për Bashkinë e Himarës do të jetë kandidati i Partisë Socialiste Vangjel Tavon, të cilin Rama e kishte paracaktuar që prej më shumë se një viti, duke e emëruar në postin e Prefektit të Qarkut të Vlorë dhe ka filluar prej kohësh edhe fushatën ku në fokus kanë qenë legalizimet.
