Argjentina ka bërë historinë në Kupën e Amerikës, teksa ka triumfuar falë një goli të Lautaro Martines në kohën shtesë, në ndeshjen e cila u shty për më shumë se një orë për shkak të problemeve të mëdha me hyrjen e tifozëve në stadiumin “Hard Rock” të Majemit.
Sa i përket finales, rastet më të mira erdhën në shtesën e pjesës së parë me Lermën për kolumbianët e Messin për Argjentinën, të cilat nuk u finalizuan me sukses.
Në minutën e 65, Leo Messi la fushën mes lotësh për shkak të një dëmtimi, teksa pamjet treguan kyçin e këmbës të ënjtur. Legjenda e futbollit ishte dukshëm emocional teksa shikonte ndeshjen nga pankina, ndërsa fotot televizive dukeshin që tregonin kyçin e tij të djathtë të fryrë. Por lotët u kthyen në brohoritje pas fishkëllimës së fundit, kur Messi përqafoi shokët dhe trajnerët e tij me një buzëqeshje të madhe në fytyrën e tij.
Ndërsa zëvendësuesi i tij, Nico Gonzales, pati impakt të menjëhershëm duke shënuar gol, por festa u ndal nga flamuri i anësorit, që sinjalizoi pozicion jashtë loje.
Goli vendimtar për Argjentinën erdhi në minutën e 112′, kur Lautaro Martinez, i cili u shpall edhe golashënuesi më i mirë i turneut, shfrytëzoi një pasim të Lo Celsos për të dërguar topin në rrjetë, teksa festën e ndau me Messin në pankinë.
Kolumbia provoi të reagojë, por pa rezultat, teksa në sekondat e fundit pretendoi edhe një penallti, por nuk mendonte kështu arbitri dhe VAR-i. Argjentina u bë mbretëresha e kontinentit, duke fituar Kupën e Amerikës për herë të 16 në histori e duke lënë pas Uruguajin me 15.
