Komisioni i Pavarur i Kualifikimit njoftoi të premten se kishte vendosur konfirmimin në detyrë të ndihmëses ligjore të Gjykatës Administrative të Apelit Tiranë, Anida Bica.
KPK dëgjoi më herët këtë javë Bicën në seancë dëgjimore, ku ajo dha shpjegime për gjetjet në kriterin e pasurisë që kishin të bënin më së shumti me transaksione të disa pasurive të kryera nga bashkëshorti para fillimit të detyrës dhe përpara martesës.
Ajo mori vlerësim pozitiv për pastërtinë e figurës, si dhe nuk u evidentuan probleme për profesionalizmin.
Procesi i vetingut për këtë subjekt rivlerësimi u krye nga trupa e KPK e kryesuar nga Pamela Qirko, me relatore Valbona Sanxhaktarin dhe anëtare Alma Faskajn. Në cilësinë e vëzhguesit ndërkombëtar ishte i pranishëm Gerrit Sprenger.
Bica ka filluar të ushtrojë detyrën e ndihmëses ligjore pranë Gjykatës Administrative të Apelit Tiranë në vitin 2015./ BIRN
