Komisioneri Shtetëror i Zgjedhjeve, Ilirjan Celibashi duket se nuk i intereson vendimi i Komisionit Rregullator në KQZ, i cili vendosi të mos e miratonte projekt-vendimin për afatet e zgjedhjeve të 4 Gushtit për kreun e Bashkisë së Himarës.
Anëtarët e Komisionit Rregullator e konsideruan si të pavlefshëm për shkak se nuk kishte bazë ligjore, vendimin e Celibashit, për të shpallur të pavlefshëm mandatin e Fredi Belerit, e po kështu për pasojë bëhet i pavlefshëm edhe dekreti i Presidentit Bajram Begaj, por Komisioneri Shtetëror i Zgjedhjeve u shpreh i bindur në ligjshmërinë e vendimmarrjes së tij.
Celibashi tha se Komisioni Rregullator nuk mund të gjykojë vendimet e tij, teksa shtoi se ai nuk mund të pengojë procesin zgjedhor, duke miratuar kështu ditën e sotme edhe ndarjen e komisionerëve për zgjedhjet e pjesshme të Himarës që mbahen më 4 Gusht
“Jam i bindur për ligjshmërinë e vendimmarrjes. Dikush e shikon ketë vendim jo të duhur, palët kanë të drejtën e tyre për ta kontestuar vendimmarrjen e komisionerit. Për saktësi vendimi i komisionit nuk është vendim për shkarkim, pasi nuk bazohet në ligjin e organeve të qeverisjes vendore, por bazohet tek ligji i dekriminalizimit.
Ka vendime që lidhem me afate te cilat përcaktohen nga vendimmarrja e këtij organi, por ka aspekte të tjera përgatitore që nuk lidhen me këtë vendimmarrje. Ne jemi në përgatitje të këtij procesi. Nuk është ky institucioni për të dhënë gjykime pse jemi në zgjedhje. Ajo çfarë kemi për detyrë është të përgatisim zgjedhjet. Ekziston kjo e drejte për t’u ankuar ndaj çdo organi te KQZ. Kush ka interes mund te shkojë në gjykatë.” – tha Celibashi.
Kandidati i mazhorancës për kreun e Bashkisë së Himarës është Vangjel Tavo, teksa ai do të ketë përballë kandidatin e opozitës, Petro Gjikuria.
