Presidenti i FSHF Armando Duka ka dhënë një intervistë për italianen “Sport Italia”, ku ndër të tjera ka komentuar paraqitjen e Shqipërisë në Kampionatin Europian Gjermani 2024.
Kreu i FSHF-së është i kënaqur me performancën e kuqezinjve në tre ndeshjet e grupit, ndonëse u eliminuan pasi grumbulluan vetëm 1 pikë. Duka gjithashtu i pyetur për trajnerin Sylvinho deklaroi se kontrata e tij ka skaduar dhe që i kanë ofruar atij rinovimin por ende nuk ka përgjigje nga ana e brazilianit.
Shqipëria në Euro 2024- Kombëtarja Shqiptare ka treguar disa paraqitje mjaft të mira në këtë Europian, për të cilat duhet të jemi krenarë, duke pasur parasysh që ishim në atë që quhej edhe grupi i ferrit. Dua të falënderoj të gjithë djemtë, si ata që kontribuan vetëm në eliminatore, ashtu edhe ata që luajtën në Europian. Jam i pakënaqur vetëm me rezultatet, pasi çdo gjë tjetër ishte mjaft pozitive.
Tifozeria shqiptare në Gjermani- Kanë qenë fantastikë duke mbështetur vazhdimisht skuadrën dhe duke u sjellë si asnjë tifozeri tjetër në Gjermani. Kanë krijuar atmosferë të jashtëzakonshme si në stadium, ashtu edhe në qytetet ku luheshin ndeshjet.
Situata me trajnerin Sylvinho –Kontrata e tij ka përfunduar pas eliminimit nga Europiani, por ne i kemi ofruar rinovimin që në muajin janar dhe propozimi qëndron ende. Besoj se do të finalizojmë shpejt marrëveshjen, pasi edhe ne duam të vazhdojmë bashkëpunimin. Aktualisht Sylvinho është me pushime dhe javën e ardhshme do të takohemi sërish për të diskutuar për vijimin e punës së nisur së bashku.
