Në pamundësi për të dalë nga banesa pasi prej 30 dhjetorit ndodhet në “arrest shtëpie”, kreu i PD-së Sali Berisha nuk ka munguar në homazhet që u zhvilluan sot në nder të Ismail Kadaresë.
Nëpërmjet një kurore me lule Kryetari i PD Sali Berisha ka ‘marrë pjesë’ sot paradite në homazhet e zhvilluara në TKOB në nder të gjeniut të letrave shqipe.
N/Kryetari Luçiano Boçi në “Librin e Kujtimeve” shkruan: “Në emër të Kryetarit të Partisë Demokratike Sali Berisha shprehim pikëllimin e madh për humbjen e gjeniut, figurës së ndritur, i cili me veprën e tij tejshkoi kohën, theu normat dhe tabutë ideologjike të socrealizmit dhe i dha letërsisë shqiptare dhe shpirtit shqiptar përmasë botërore! I paharruar do të mbetet Kadare dhe vepra e tij do ndikojë në shekuj shpirtin dhe krenarinë tonë”.
Kurora është vendosur nga n/kryetari Luçiano Boçi dhe deputetja Albana Vokshi.
