Policia e Lezhës ka reaguar në lidhje me të riun nga Shkodra që u gjet i plagosur në afërsi të rrethrrotullimit të Shëngjinit.
Raportohet se i plagosuri është shtetasi Gentian Bajrami, 22 vjeç. Sipas autoriteteve policore, nga hetimet e deritanishme dyshohet se i riu ka rënë aksidentalisht nga lartësia e një lokali në vendin ku është gjetur i dëmtuar.
Gentian Bajrami fillimisht është transportuar me ambulancë drejt spitalit, ku ka marrë ndihmën e parë mjekësore dhe më pas është dërguar drejt spitalit të Traumës në Tiranë, për mjekim më të specializuar.
Policia raporton se 22-vjeçari = është në gjendje të rëndë shëndetësore. Mësohet se ai është gjetur me fraktura në kokë.
Grupi hetimor po punon për të zbardhur dhe dokumentuar me prova ligjore rrethanat e kësaj ngjarjeje.
