Zbardhen të tjera detaje nga ngjarja e rëndë në Mirditë.
Ledovik Syziu mbeti sot i plagosur, pasi në makinën e tij i ishte vendosur një bombë, e cila shpërtheu sapo ai ndezi mjetin.
Megjithëse nuk ka asnjë precedent penale, burime nga policia bëjnë te ditur se po hetohet nëse Ledovik Syziu ka patur ndonjë konflikt të kohëve të fundit ndërmjet tij dhe ndonjë banori te zonës.
Në dëshminë e parë të dhënë pasi ka marrë ndihmën mjekësore, Syziu ka deklaruar se “nuk kam asnjë dijeni për autorët apo shkaqet“, por ndërkohë janë thirrur për t’u marrë në pyetje edhe familjare të tij me qëllimin për të mësuar për ndonjë incident që mund të ketë patur i plagosuri.
Ky shtetas njihet si njeri problematik në fshat si dhe ka një vëlla të zhdukur që prej vitit 1997, i cili është i dyshuar si autor i disa ngjarjeve në vitin e mbrapshtë.
- Kush është Dritan Syziu?
Nga ana tjetër, një pistë e mundshme është dhe e shkuara kriminale, pasi 47-vjeçari Ledovik Syziu është vëllai i kreut të bandës së Mirditës, Dritan Syziu, një nga 50 personat më të rrezikshëm në Shqipëria.
Ky i fundit është i dyshuar si autor i disa ngjarjeve në Mirditë në vitin 1997, ndërsa prej tij prej gati rreth 20 vitesh nuk ka asnjë gjurmë. Ai njihet nga të gjithë si kreu i Bandës së Mirditës.
Syziu është dënuar me burgim të përjetshëm pasi për një ngjarje që ka ndodhur më 28 qershor të vitit 2000, ku mbeti i vrarë punonjësi i policisë, Gjon Paçuku. Këtë vrasje ai e ka kryer në bashkëpunim me 5 persona të tjerë.
- Çfarë njofton policia për shpërthimin me tritol?
“Rreth orës 08:05, Salla operative e Komisariatit të Policisë Mirditë është njoftuar se në fshatin Malaj, në oborrin e banesës së shtetasit L.S, në momentin që ky shtetas ka ndezur automjetin, në pjesën e pasme të automjetit ka ndodhur një shpërthim.
Për pasojë shtetasi L.S, është dëmtuar dhe po merr ndihmë mjekësore në Spitalin Rajonal të Mirditës jashtë rrezikut për jetën. Menjëherë në vendngjarje kanë shkuar shërbimet e Policisë dhe grupi hetimor.
Nga veprimet e para dyshohet se ka shpërthyer lëndë artizanale. Nën drejtimin e Prokurorisë Grupi hetimor po vijon intensivisht punën për sqarimin e rrethanave të ngjarjes dhe për sigurimin e provave me qëllim zbardhjen dhe dokumentimin ligjor të rastit“, thuhet në njoftimin e policisë.
Lexo edhe:
Detaje nga ngjarja në Mirditë/ Makina shpërtheu sapo u ndez, zbardhet dëshmia e të plagosurit
EMRI/ I vendosën lëndë shpërthyese në makinë, plagoset një person në Mirditë
