2105 bimë dhe fidanë kanabisi janë agjesuar në Lezhë, Kurbin dhe Mirditë nga Policia në 24 orët e fundit, në vijim të operacionit “Territori i Pastër”, pas evidentimit të tre rasteve.
Si rezultat janë arrestuar dy persona në Lezhë dhe në Kurbin, ndërsa një person tjetër është shpallur në kërkim në Mirditë.
Më konkretisht, janë evidentuar dhe asgjësuar nëpërmjet djegies 1445 bimë narkotike kanabisi, të kultivuara në fshatin Kashnjet, të Njësisë administrative Ungrej në Lezhë. Gjatë këtij operacioni, është kapur shtetasi Gjovalin Lleshi, 45 vjeç, banues në Lezhë. Sipas Policisë, nga terësia e veprimeve hetimore të kryera në kuadër të hetimit proaktiv të nisur mbi kultivimin e këtyre bimëve, janë siguruar prova, ndër to edhe filmike se ky shtetas është autori i kultivimit të bimëve të gjetura.
Ndërkohë, në fshatin Fushë Gjormë të Kurbinit janë gjetur brenda një parcele 360 bimë narkotike kanabisi. Si rezultat është arrestuar në flagrancë shtetasi Dilaver Lika, 57 vjeç.
Policia e Lezhës ka gjetur dhe në vendin e quajtur “Kroi i Kingjit”, në fshati Xhuxhë të njësisë administrative Fan në Mirditë 300 fidanë narkotikë të kultivuara në kubikë plastikë. Në kuadër të këtij operacioni është shpallur në kërkim shtetasit Martin Marku, 48 vjec, lindur në Xhuxhë, Fan, Mirditë dhe banues në Durrës.
“Gjatë kontrolit të ushtruar në banesën e tij, u gjetën edhe dy automjete me të cilët dyshohej se ky shtetas kishte transportuar kubiket me fidanë për ti kultivuar në tokë, si dhe u gjetën e sekuestruan edhe prova të tjera që kanë lidhje me këtë aktivitet kriminal.” – thuhet në njoftimin e Policisë
Materialet procedurale i kaluan Prokurorisë së Lezhës për veprime të mëtejshme.
