Komisioni i Etikës dhe Disiplinës në UEFA ka vendosur të gjobisë sërish Federatën Shqiptare të Futbollit për shkak të sjelljes së tifozëve kuqezi në ndeshjen kundër Kroacisë të përfunduar me rezultatin 2-2 e vlefshme për grupin B të kampionatit europian.
FSHF-ja është gjobitur sërish me 47,500 euro, po aq sa edhe në ndeshjen kundër Italisë, teksa penalizimi financiar ka ardhur sërish nga problematika e shkaktuar nga disa tifozë shqiptarë, të cilët ndezën flakadanë, transmetuan mesazhe të papërshtatshme, si dhe për ndërprerjen e ndeshjes nga një tifoz gjatë zhvillimit të lojës.
FSHF u bën apel tifozëve që të jenë më të përgjegjshëm dhe të shmangin krijimin e këtyre incidenteve dhe trazirave totalisht të evitueshme, që mund të sjellin penalitete financiare dhe dëmtojnë imazhin e Shqipërisë dhe futbollit shqiptar. Gjithashtu, FSHF bën me dije se gjatë ndeshjeve nuk lejohen mesazhet me natyrë jo sportive (politike, etnike, etj).
Vendimet e plota të Komisionit të Etikës dhe Disiplinës në UEFA:
Të gjobisë Federatën Shqiptare të Futbollit me 2500 euro për ndezjen e fishekzjarreve.
Të gjobisë Federatën Shqiptare të Futbollit me 20.000 euro për pushtimin e fushës.
Të gjobisë Federatën Shqiptare të Futbollit me 25.000 euro për transmetim e mesazheve të papërshtatshme për një ngjarje sportive.
