Gjatë kontrolleve të kryera nga policia në disa fshatëra në Krujë janë zbuluar toka ku po kultivohej drogë.
Nga kontrollet e kryera në fshatin Burz Mal dhe në fshatin Shkretë u konstatuan disa ambiente të përshtatura për kultivim. Brenda këtyre ambienteve janë gjetur 1150 bimë kanabis.
Policia nuk raporton për persona të arrestuar apo në kërkim për këtë rast.
“Komisariati i Policisë Krujë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, në vijim të punës për parandalimin e kultivimit të bimëve narkotike dhe në zbatim të masave të përcaktuara në planin operacional “Territor i pastër”, ka vijuar kontrollet në terren.
Gjatë kontrolleve në fshatin Burz Mal dhe në fshatin Shkretë, u konstatuan disa ambiente të përshtatura për kultivim, në të cilat u gjetën 1150 bimë të dyshuara narkotike kanabis. Një pjesë e tyre u sekuestrua në cilësinë e provës materiale, ndërsa pjesa tjetër u asgjësua me anë të djegies.”- njofton policia.
Materialet procedurale i kaluan Prokurorisë, për veprën penale “Kultivimi i bimëve narkotike”, parashikuar nga neni 284 i Kodit Penal.
