Zvicra e ka nisur si duhet Kampionatin Europian teksa ka marrë një fitore relativisht të lehtë përballë Hungarisë.
Me Granit Xhakën kapiten, “Helvetët” triumfuan me rezultatin 1-3 duke marrë tre pikët e parë në Grupin A.
Golat për djemtë e teknikut, Murat Yakin erdhën që në pjesën e parë të sfidës, teksa fillimisht ishte 27-vjeçari i Ludogorets, Këadëo Duah, që në minutën e 12’-të të ndeshjes dhe 30 minuta më vonë ishte Michel Aebischer, i cili dyfishoi shifrat.
Me nisjen e fraksionit të dytë të lojës, Barnabas Vargas ngushton diferencën në 1 me 2, falë krosimit të Szoboszlai, mirëpo vetëm kaq pasi Zvicra mori sërish në dorë “frenat” e lojës, duke arritur të shënojë edhe golin e 3-të në fundin e sfidës, për të “vulosur” gjithçka.
Kështu, Zvicra ngjitet në kuotën e 3 pikëve, në Grupin A, po aq sa Gjermania e vendit të parë, por renditen poshtë këtyre të fundit, për shkak të fitores së thellë, që “Pancerat” siguruan ndaj Skocisë.
Ndërkaq, në sfidat e radhës Zvicra do të ndeshet me Skocinë, ndërsa Hungaria me Gjermaninë.
