Anëtari i Kryesisë së PD-së, Grigels Muçollari, ka theksuar se beteja e radhës e demokratëve dhe njerëzve të lirë është lirimi e kryedemokratit Sali Berisha, pasi nuk mund të ketë zgjedhje të lira dhe të ndershme me liderin e opozitës në burgim politik pa prova pa akuzë.
Sipas Muçollarit, në momentin që respektohen të drejtat e opozitës arrihet balanca e një demokracie të vërtetë si në çdo vend europian, ku pushteti duhet t’i japë llogari njerëzve.
“Nuk ka demokraci pa zgjedhje të lira dhe të ndershme. Nuk ka se si të ketë zgjedhje të lira dhe të ndershme me liderin e opozitës, me kryetarin e PD në një burgim politik pa provë pa akuzë.
Beteja jonë e radhës është kjo dhe nuk është vetëm për ne demokratët nuk është për Sali Berishën por është për shoqërinë shqiptare.
Nga kjo fillon ‘abc’-ja e çdo shoqërie. Respektimi i të drejtave të opozitës dhe më pas arrihet balanca e një demokracie të vërtetë si në çdo vend europian. Arrihet marrëdhënia e artë mes pushtetit dhe njerëzve, ku pushteti duhet t’i japë llogari njerëzve, ku pushteti nuk mund të prodhojë një narko-shtet.”- deklaron Muçollari.
