Rey Manaj zhvilloi sezonin më të mirë të karrierës edicionin që u mbyll duke shkëlqyer më fanellën e Sivassporit.
Kampionatin turk e mbylli me 18 gola, si shënuesi i tretë më i mirë i Ligës pas Mauro Icardit dhe Edin Dzekos.
Sulmuesi lushnjar është i destinuar për t’u larguar këtë verë nga Turqia. Për të ka patur shumë oferta gjatë kësaj periudhe. Në “pole” qëndron Lazio, klub që është gati të paguajë deri në 15 mln euro për ta rikthyer në Serie A.
Sivasspori e ka bërë të qartë se vetëm një shifër e tillë mund ta kënaqë, por tani në mes është dhe kampionati europian. Në Turqi e dinë mirë se një performancë e mirë në finalet e Gjermanisë do ia rriste dhe më tepër vlerën shqiptarit.
Manaj ka luajtur dhe më parë në Serie A, ndërkohë që është një prodhim i akademisë së Interit. Tashmë 27-vjeçari mund të jetë gati për të bërë hapin e madh.
Te Sivasspori presin që goleadori të lërë gjurmë dhe me fanellën kuqezi në duelet ndaj Italisë, Kroacisë dhe Spanjës. Që të përfitojnë sa më shumë nga shitja e tij.
