Ardit Muça, ish-përgjegjës i Sektorit IT në Policinë e Shtetit dhe Besjan Tanuzi, ish Drejtor i Sistemeve, në Policinë e Shtetit kanë dëshmuar me dyer të mbyllura në Komisionin Hetimor për rrjedhjen e të dhënave në sistemin “TIMS”.
E njëjta gjë do të ndodhë edhe me Ervina Gjana, drejtoresha e Krimit Kibernetik në Policinë e Shtetit. Socialistët me 7 vota pro kandë miratuar kërkesën që ajo të dëshmojë me dyer të mbyllura, pavarësisht se opozita ishte kundër dhe ngulmoi deri në fund që të dëshmonte me praninë e mediave.
“Duke qenë se të gjitha dëshmitë janë dhënë me dyer të mbyllura dhe struktura që unë drejtoj është një strukturë hetimore unë do propozoja që të bëhej dëshmia me dyer të mbyllura. Nëse jo për mua nuk ka problem, por do të preferoja me dyer të mbyllura.”, tha Gjana.
Ndërkohë Ervin Salianji kërkoi që të bëhej transparencë, por socialistët dolën në mbrojtje të Gjanës, duke vendosur që marrja në pyetje të saj të bëhej me dyer të mbyllura.
“Jemi përpara kundërthënieve, çfarë ka thënë njëri nuk thotë tjetri. Ndaj le të jetë publiku që do e vendosë, duke bërë transparente punën tonë.
Me 7 vota pro të socialistëve dhe 6 kundër të opozitës, u vendos që mbledhja e Komisionit të zhvillohet me dyer të mbyllura. Ne këtu kemi qenë, asnjë nga dëshmitarët nuk ka dhënë dëshmi që përbëjnë sekret, por duket se socialistët nuk duan transparencë”, tha Salianji.
