Një ngjarje e rëndë është shënuar së fundmi në Dhërmi. Pronari i hotelit “Greccia” vrau recepsionistin 31-vjeçar, Eraldo Nevruzin.
Pas shumë orësh kërkime nga ajri dhe toka me dronë e helikopterë, trupi i pajetë i të riut u gjend paraditen e sotme afër një guroreje duke shkuar për në Vuno, në vendin e quajtur Gjipe.
Trupi i recepsionistit pas vrasjes ishte fshehur nga autori i krimit në bashkëpunim me 2 persona të tjerë, Daniel Qosen dhe David Lartin, të cilët u arrestuan ditën e sotme.
- Çfarë dëshmuan dy punonjësit që ndihmuan pronarin vrasës
Dy punonjësit e hotelit “Greccia”, Daniel Qose, 33 vjeç dhe David Larti, 30 vjeç nga Korça kanë dëshmuar se nuk kanë dijeni për vendndodhjen e trupit.
Daniel Qose dhe David Larti kanë deklaruar se e kanë ndihmuar Gerald Shehun vetëm për ta futur trupin e pajetë në bagazh, teksa sipas tyre, ai e la tek shkallët e hotelit pas një konflikti me njëri tjetrin.
“Na ka bërtitur me tone të larta për të marrë qeset dhe e kemi futur trupin në bagazh por më pas nuk dimë gjë”, janë shprehur dy punonjësit.
Gerald Shehu u arrestua ditën e djeshme në Korfuz, teksa ishte në aeroport për t’u larguar në drejtim të Anglisë, vend në të cilin kishte dokumenta të rregullta qëndrimi.
Gerald Shehu akuzohet për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”, ndërsa shtetasit Daniel Qose dhe David Larti akuzohen për veprën penale “Fshehja ose asgjësimi i kufomës”, kryer në bashkëpunim.
- Autori dhe viktima njiheshin më parë
Gerald Shehu është bashkëpronar i hotelit “Greccia” në Dhërmi bashkë me vjehrrën e tij Gentjana Nino, teksa Eraldo Nevruzi kishte vetëm një javë që kishte nisur punë si recepsionist në këtë hotel.
Viktima dhe autori njiheshin prej kohësh, pasi kishin jetuar bashkë dhe në Angli, teksa dyshohet se do të hapnin dhe biznes bashkë.
- Si ndodhi ngjarja
Ngjarja dyshohet se ka ndodhur pas mesnatës së të mërkurës, 6 qershor, ndërsa u zbulua vetëm pasi në një prej dhomave në hotel ku është vrarë 31-vjeçari janë gjetur njolla gjaku.
Të dy, autori dhe viktima kanë qenë në brendësi të hotelit ‘Greccia’ në Dhërmi kur dyshohet se janë konfliktuar.
Gerald Shehu ka nxjerr armën dhe dyshohet se e ka qëlluar me një plumb në kokë.
Në vendngjarje nuk është gjetur asnjë gëzhojë, sepse autori ka i ka hequr.
Pas vrasjes, 43-vjeçari dyshohet se ka mbledhur trupin me një çarçaf, e ka futur në makinë dhe e ka zhdukur trupin.
Ndërkohë, Policia po vijon hetimet për zbardhjen e plotë të shkaqeve të ngjarjes.
