Shqipëria sfidon Azerbajxhanin në Hungari, me takimin që ka nisur në orën 19.00.
Kuqezinjtë e Kombëtares sonë do të mbyllin zyrtarisht fazën minipërgatitore, të Kampionatit Evropian të futbollit, “Gjermani 2024”, teksa sot do të kërkojnë fitoren e dytë radhazi në miqësore.
Ky duel vjen pas fitores 3-0 që kuqezinjtë siguruan katër ditë më parë kundër Lihtenshtajnit.
Trajneri Sylvinho ka bërë pesë ndryshime nga ndeshja e fundit tre ditë më parë, teksa ky pritet të jetë formacioni më i mundshëm edhe për në finalet e Euro 2024.
Mes shtyllave rikthehet titullar Thomas Strakosha, ndërkohë që në prapavijë e nisin nga minuta e parë kapiteni Berat Gjimshiti dhe Elseid Hysaj.
Në mesfushë Ylber Ramadani zëvendëson Klaus Gjasulën, ndërkohë që konfirmohen në sulm Armando Broja dhe Jasir Asani. Repart ku ka fituar një fanellë titullari edhe Taulant Seferi.
