Policia e Vlorës ka arrestuar dy persona të tjerë për vrasjen me armë zjarri të recepsionisti të hotelit “Greccia” në Dhërmi, Eraldo Nevruzi, 31 vjeç nga Tirana, ndërkohë që autori i dyshuar i krimit Gerald Shehu, 43 vjeç nga Tepelena, por me banim në Angli u arrestua mbrëmjen e djeshme në aeroportin e Korfuzit në Greqi.
Sipas bluve të qytetit bregdetar, në pranga janë vënë shtetasit Daniel Qose, 33 vjeç dhe David Larti, 30 vjeç, të dy banues në Korçë, të cilët janë punonjës të hotelit “Greccia” në Dhërmi, vendi ku dyshohet se ndodhi krimi.
Sipas autoriteteve policore, nga veprimet hetimore të kryera për zbardhjen e plotë të ngjarjes, dyshohet se dy korçarët kanë ndihmuar autorin e krimit Gerald Shehu për të fshehur trupin e viktimës pas kryerjes së krimit.
Gjithashtu, Policia raporton se nga këqyrja e banesës ku qëndronte Gerald Shehu, në një kasafortë në dhomën e gjumit, është gjetur një fishek arme zjarri, me kapsollë të goditur, i cili u dërgua në Institutin e Policisë Shkencore, për ekzaminim. Po ashtu, në funksion të hetimeve të thelluara janë marë për ekzaminime të mëtejshme, sende dhe mjete të tjera të cilat dyshohet se janë përdorur në këtë ngjarje.
Gerald Shehu akuzohet për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”, ndërsa shtetasit Daniel Qose dhe David Larti akuzohen për veprën penale “Fshehja ose asgjësimi i kufomës”, kryer në bashkëpunim.
Gerald Shehu është bashkëpronar i hotelit “Greccia” në Dhërmi bashkë me vjehrrën e tij Gentjana Nino, teksa Eraldo Nevruzi kishte vetëm një javë që kishte nisur punë si recepsionist në këtë hotel. Viktima dhe autori njiheshin prej koshësh, pasi kishin jetuar bashkë dhe në Angli, teksa dyshohet se do të hapnin dhe biznes bashkë.
Ngjarja dyshohet se ka ndodhur pas mesnatës së të mërkurës, 6 qershor, ndërsa u zbulua vetëm pasi në një prej dhomave në hotel ku është vrarë 31-vjeçari janë gjetur njolla gjaku. Të dy, autori dhe viktima kanë qenë në brendësi të hotelit ‘Greccia’ në Dhërmi kur dyshohet se janë konfliktuar. Gerald Shehu ka nxjerr armën dhe dyshohet se e ka qëlluar me një plumb në kokë. Në vendngjarje nuk është gjetur asnjë gëzhojë, sepse autori ka i ka hequr.
Pas vrasjes, 43-vjeçari dyshohet se ka mbledhur trupin me një çarçaf, e ka futur në makinë dhe e ka zhdukur trupin. Kërkimet për gjetjen e trupit të viktimës vijojnë në aksin Dhërmi-Himarë, pasi dyshohet se Gerald Shehu nuk e ka fshehur shumë larg vendit të ngjarjes.
Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Vlorë.
